Uit tijdschrift "Ons Meetjesland", 1984, 17de jaargang, nr. 4

Voetnoot 20, blz 152, Maldegem die grote

Sententie gewezen in den Raed van Vlaenderen in voordeel van die van Eecloo tot last van die van Maldeghem, namelyk dat dezen geene kennis mogen nemen op de Keurbroeders van Eecloo, noch dezelven mogen arresteren.

9 Mei 1440.

De raedsliede mijns heeren hertoghe van Bourgoingnien, ende van Lijmburch, Grave van Vlaendren, van Artois, van Bourgoignien, van Henegauwe, van Hollandt, van Zeelant ende van Namen, gheordonneert in Vlaendren.  Allen den ghonen die dese ons lettren sullen sien oft hooren lesen saluut.  Ute dien dat zeker ghedinghe eene wile es leden voor ons rees, ende noch hanghende es inde camere vanden rade ons vorseits heeren te Curtricke, tusschen Burchmeesters, ende Scepenen vander stede van Eecloo, Jan de Ketelboetere, Gheeraerdszone, Loij ende Pauwels van Beeken Joriszonen, Lauwers Staes, Jan de Ketelboetere Jacobszone, Jacop Huusheere, Jan Vanden Torre Claijszone, Clais Hasaert ende andere cuerbroeders vander voorseide stede van Eecloo, even verre dat elcken angaen mach, heesschers of een zijde, ende Lampsin Coppins, bailliu, Boudin Maijaert, Jan Loocke Wouter Heijman, Pieter Coolman, Gillis van Praet, Jan de Vuldere ende Zegher de Breede, Scepenen van Maldeghem verweerers, over ander zijde, up tghuendt dat de voorseide heesschers ons hadden ghedaen tooghen ende zegghen hoe dat den tiensten dach maerte int jaer duust vier hondert een ende dertich, de voorseide heesschers waren commen clachtich an ons met supplicatien, inhoudende dat de voorseide Jan de Ketelboetere Gheeraerdszone met zijne medepleghers hierboven ghenoemt ghnoemt ghetrocken waren int heerschip van Maldeghem ten huuse ende woonste van Martin Mateeux aldaer zij gheaemienert hadden Kathelinen dochter vanden zelven Martin Mattheeux ende die ghebrocht gheleet inde voorseide stede van Eecloo, zonder eennich hulpgheroup, crachte, fortse ofte violentie ende zonder eenichseins ghearesteert ghehecht oft ghevanghen tzijne up tvoorseide heerschip van Maldeghem, in meenighe dat de voorseide Jan de Ketelboetere Gheeraerdszone de zelve Katheline trauwen zoude alzo hij daer naer dede, twelcke commen wesende ter kennesse vanden voorseiden bailliu van Eecloo oft van zijnen stedehoudere dezelve bailliu hadde ghevaen corts daer naer de voorseide cuerbroeders van Eecloo omme selfs fautswille zonder clachte oft verzoucke van partien de welcke cuerbroeders van den zelven faicte ende van den mesgripe, bij hemlieden hierin ghebesicht, ende van al tguendt dat zij daerin mesdaen mochten hebben, bi hueren vrijen dancke ende wille, hemlieden ghesubmitteert hadden int zegghen ende ordonnancie vanden heere ende vander wet vander voorseide stede van Eecloo, ende doe den selven bailliu uter name van onsen voorseiden heere daeraf ghenouch ghedaen ende al waest zo dat de voorseide cuerbroeders van Eecloo ende dinwonende vanden voorseiden heerscepe van Maldeghem waren ende zijn van zulcker condicie deen jeghen dandere, dat zo wanner eenich van hemlieden eenich faict ghedaen hadde oft dede up theerschip vanden anderen, ende dat hij conste van daer ontcomen ouphehecht ende onghearresteert, hij scoet was ende es sculdich te staene te wette van dien faicte daer hij wonachtich was, ende niet daer tfaict gesciede.  Nietmin het hadde ghelieft den voorseiden bailliu van Maldeghem de voorseide cuerbroeders van Eecloo te wette te stellene van den voorseiden faict te Maldeghem voor scepenen van daer ende hadde zo verre jeghens hemlieden gheprocedeert als dat den allevensten dach vander voorseide maent van maerte zij gescepen hadden ghezin ghebannen te werdene omme tvoorseide fait, oft dat de zelve scepenen van Maldeghem hemlieden beleedt zouden hebben up de voorseide sake tbueren wettelicken hoofde burghemeesters ende scepenen stands vanden vrijen, nietjeghenstaende dat den selven verweerers duechdelic ghecertiffiert ghezin hadde dat de voorseide cuerbroeders van Eecloo vande voorseide faite ghenouch ghedaen ende ghecomposeert hadden tEecloo alzo voorseit es, vercrighende de voorseide heesschers up huer voorseide te kennen gheven onse opene letteren van commissien, ende doende bij virtute van dien voor ons betrecken de voorseide verweerers de welcke naer zeker delaeijen ende uutstellen hierup ghehouden, overmidts dat de voorseide heesschers niet betooghen en consten tonderhout van der voorseide zake vercreghen orlof van hove ende costen jeghen de voorseide heesschers onder tdexel van welcken orlof van hove de voorseide verweerers hemlieden vervoordert hadden voort te willene gane ende procederen te wette up de voorseide cuerbroeders van Eecloo, omme hemlieden te verbannene upden zeven ende twintichsten dach van hoijmaent int jaer viere ende dertich van den voornoemden faicte.  Omme up twelcke voorsienicheijt thebbene, de voorscreven heesschers weder an ons clachtich commen waren over de voorseide verweerders, die zij van nieux betrocken hadden, contenderende ten fine dat zij ghecondempneert worden hemlieden te verdraghene van voorder te procederen te wette upde voorseide cuerbroeders van Eeclo, heesschers, bij banne oft andersins ter cause van den voorseiden faicte, ende dat mids de compositie der af ghemaect bijden voorseiden cuerbroeders jeghen de voorseide bailliu ende scepenen van Eecloo zij bij ons gheabsolveert ende ghewijst worden los, ledich ende quite van den zelven faite, waerjeghen de voorseide verweerers hadden ghedaen tooghen ende zegghen dat theerscip van Maldeghem was ende es een notable heerscip verghift ende gheprevilegiert als een vanden zeventien steden van Vlaendren van schoonen previlegien, vrijheden, costumen, usaigen, possessien ende saisinen hebbende alle justitie hooghe, middele ende nedere, bailliu, mannen, scepenen ende andere officiers nuttelic ende oirboirlic omme de justicie daer te bewaerne ende te mainteneerne naer de wetten, costumen ende usaigen van den zelven heerscepe.  Ten title van den welcken de voorseide wethouders elc int zine hadden recht ende waren in goeder ende paisivelice possessien ende saisinen thebbene de kennesse ende tberecht van allen faicten criminelen ende civilen, ende alsoo wel van ontscake als anders ghecommitteert ende gheperpetreert up tvoorseide heerscip van Maldeghem, ende al zoo wel up cuerbroeders van Eecloo als up andere alwaert ooc zo dat zij onghehecht ende onghecalengiert schieden met hueren faicte vanden zelven heerscipe van Maldeghem, ende up dat zulcke facteurs van criesme daer ghevanghen ende ghehecht worden, men dede van hemlieden justicie criminele metten zweerde of metter ghalghe alsoot behoorde naer de qualitheijt van der mesdaet, ende daer zij schieden vanden voorseiden heercepe onhehecht ende onghecalengiert van hueren criminelen faiten, men achterhaelde die ende verwante wette naer der costume alsoot behoorde, die voort bannene uut den lanne ende graefscepe van Vlaendren van ons voorseids heeren weghe, ende van sheeren weghe van Maldeghem, ghemerct dat onze voorseide heere daer recht hadde ende heeft van te hebbene ende te heffene de heelfscheede in allen boeten ende broken ende van desen ende velen anderen rechten ende heerlicheden zo hadden de voorseide verweerers gheuseert ende ghepossesseert van zulcken ende zo ouden tijden dat niement en ghedochte der contrarien ten zienne, hoorne ende wel wetene vanden voorseiden heesschers ende allen andren diet hadden willen zien, horen oft weten.  Nu was waer dat het ghelieft hadde den voorseiden Jan de Ketelboetere ende zijne medepleghers cuerbroeders van Eecloo, te treckene up tvoorseide heerscip van Maldeghem ten huuse ende woonste van den voorseiden Martin Mattheeux ende aldaer bij crachte jeghen den danc ende wille van den voorseiden Martin ende Kathelinen zijnre dochter te nemene ende te aenverdene der zelver Kathelinen die wech te slepene ende te leedene mer helpgheroupe naer der noene tot inder voorseide stede van Eecloo, omme twelcke de voorseide Bailliu van Maldeghem hadde de voorseide cuerbroeders te wette ghestelt vanden voorseiden faite voor de voorseide scepenen van Maldeghem ende zo verre jeghens hemlieden aldaer gheprocedeert als dat zij corts gescepen hadden gheweest bij wette ende bij justicien deraf ghebannen tzine, nemaer omme te belettene de voorseide wettelichede, de voorseide heesschers waren clachtich aen ons commen ende hadden voor ons doen daghen de voorseide verweerers in state houdende bijder overhand de wettelichede ontgonnen te Maldeghem up de voorseide cuerbroeders omme sfaitswille voorscreven.  Ende want de voorseide heesschers die sake lieten uut wette vallen, zo hadden den voorseiden verweerers gheconsenteert ghezin bij onsen vonnesse ende appointemente voort te gane inde voorseide wettelichede bij hemlieden ontgonnen te Maldeghem inden staet dat de sake stont als zoe ghestateirt was, wele vonnesse leden was in crachte van ghewijsder dinc, zonder appeel oft reclamacie.  Nietmin de voorseide heeschers hadden van nieux betrocken voor ons de voorseide verweerers omme quijte te gane vanden voorseiden faicte hemlieden fonderende up de voorseide compositie bij hemlieden ghemaect bijden voorseiden bailli van Eecloo.  Slutende ende concluderende de voorseide verweerers bij den redenen voorscreven ende andren dat de voorseide heeschers niet ontfanghelic en waren ende hadden quade cause, zouden de voorseide verweerers ontsleghen werden ende ghewijst los, ledich, ende quijte vanden heessche ende conclusien vanden voorseiden heesschers, zouden voort onze voorseiden letteren van sentencien sorteren vulle effect, ende midts dien verclaerst zijn up dats noot ware de kennesse ende tberecht vanden voorseiden faite toebehoorende den voorseiden van Maldeghem, ende niet den wetten van Eecloo, ende dat de zelve van Maldeghem voort daerin procederen zoude te wette inden zelven staet dat de zake stont te Maldeghem, ten tijden dat zoe ghestateirt was bi onsen openen letteren van commissien.  Den voorseiden heesschers zegghende ter contrarien, ende dat zij wel ontfanghelic waren inde hadden goede cause ende al hadde tandren tijden van dezer zake voor ons gedinghet gheweest ende dat de sake intterrupt ghevallen was daermede en hadden zij niet meer verloren dan de costen van die instancie ende mochten hemlieden wel beclaghen bij eener nieuwer instancie vanden voorseiden van Maldeghem, ten hende dat zij niet voort en ginghen te wette up de voorseide cuerbroeders van Eecloo van zaken daeraf zij eens ghecomposeert hadden ende ghenouch ghedaen jeghen de bailliu van Eecloo also voorscreven staet, den voornoemden verweerers sustinerende ter contrarien ende dat niet alleene de voorseide eerste zake intterrupt ghewijst gheweest en hadde, nemaer daertoe mede dat de voorseide van Maldeghem voortgaen zouden inde wettelichede voor hem lieden inghestelt vanden voorseiden faicte inden zelven staet dat de zake stont te Maldeghem ten tijde dat hemlieden verbooden was voorder derin te procedeerne, met vele meer redenen ende middelen bij elc vanden voorseiden partien daertoe gheseijt, repliquieerende ende dupliquieerende presenterende elc vanden zijnen zo vele te prouvene up dats noot ware, dat ghenoughen soude ende maecten heesch van costen deen jeghen dandre up de welcke redenen ende vermeten overghegeven thovewaerts en gescrijften zeker besouc ghedaen was bij eenighe commissarissen vanden hove hierup gheordonneert ende naer der handt zo verre gheprocedeert als dat beede de voorseide partien hemlieden concludeerden in rechte in ende up tvoorseide ghedinghe, willekuerende dat thoorne tonsen aijsemente alsoot blijcken mach bij zekere acte vanden hove daer af ghewaghende.  Soo eijst dat wij ghesien tvoorseide ghedinghe thesouc daerup ghedaen ende al ghuendt dat behoorde overghesien ende ghemerct tzine in deze zake met ripheit van rade hebben gheseijt ende ghewijst, zegghen ende wijsen ende over recht dat de voorseide heesschers hemlieden met goeder causen becroont ende beclaecht hebben vanden voorseiden verweerers.  Condenpnerende de zelve verweerers hemlieden te verdraghene van voorder te procedeerne te wette up de voorseide cuerbroeders van Eecloo, heesschers, bij banne oft andersins in eenigher manieren ter causen vanden faicte voorscreven, absolverende ende wijsende los, ledich ende quijte de zelve cuerbroeders vanden voornoemden faicte, midts der compositie daeraf ghemaect bij voorseiden cuerbroeders jeghens voorseiden bailliu van Eecloo, de welcke stede houden sal ende sorteren vulle effect.  Conpempneren de voorseide verweerers inde costen van desen ghedinghe tonser grotinghe ende tauxacie.  Van welcken vonnesse Jacob Vande Putte als procureur vande voorseide verweerers apelleerde.  In kennessen van dezen zo hebben wij den zeghel vande voorseide camer hieran doen hanghen.  Ghegheven te Curtrijcke den ixen dach van meije int jaer ons Heeren duust cccc ende viertich.  Ghescreven up den ploij: Bij minen heeren vanden rade wesende te Ghend.  Ende gheteeckent: Wielant.

  Gecollationneert gehens de originale sententie
ende daermede bevonden accorderende by my
Edinghen.

Separator

Terug naar de tekst

Naar de top van deze blz.

Inhoudstafels
1968 - 1969 - 1970 - 1971 - 1972 - 1973 - 1974 - 1975 - 1976 - 1977
1978 - 1979 - 1980 - 1981 - 1982 - 1983 - 1984 - 1985 - 1986

Welkomblz van tijdschrift "Ons Meetjesland"
Doorzoek «Ons Meetjesland»!

MijnPlatteland homepage
MijnPlatteLand.com

Meest recente bijwerking :  21-04-2021
Copyright Notice (c) 2024